No gar nid eso lang isch’s här
Da hei mer ds erscht Mal Compis gseh
Fei sperig sy die gsy u schwär
Und vil isch druff no nid grad gscheh
Bis plötzlech, i de Nünzgerjahr
Di meischte hei es Modem gha
Syt Churzem denn grad liferbar
Mit Ufdruck «56» und «K»
Das pypst und trälleret kokett
U wählt sech y i ds Internet
Ja, was me jitze het entdeckt –
Di ganzi Wält bi sich deheim!
Hesch Sache gfunde, ganz verreckt
O Züüg, wo d’ gmeint hesch, ‘s sygi gheim
Zum erschte Mal hesch Mails verschickt
Und stundelang nach Syte gsuecht
Hesch chattet, Spili gspilt wi pickt
U geng chli ab der Technik gfluecht
Was alls me da erfahre het
Ir erschte Zyt im Internet!
Knapp dryssg Jahr speter isch das Netz
Presänt bi allem, wo mir tüe
Es gälte dert spezielli Gsetz
Drum macht’s üs näbe Fröid o Müe
Wül hütt isch’s voll vo Spott u Hohn
Vo Mobbing, Hass, vo Junk u Gwalt
Vo Seich u Fählinformation –
Vo allem däm, wo üs nid gfallt
Es richtigs Gruselkabinett
Isch’s worde, üses Internet
Am allerliebschte frisst’s der Zyt
Für das isch’s üsserscht ufmerksam
Und zeigt dir Mönsche, schlank u fit
Uf Facebook und uf Instagram
U hie es Filmli, da es Meme
U Blogs u News u Podcasts o
Ja, sogar d Musig chunt per Stream
D Serie uf Netflix sowiso
Es wyters Mal geisch z spät i ds Bett
Scho wider wäg däm Internet
Wie dass me üse Hunger stillt
Das hei o d Medie schnäll erlickt
Di simpli Wahrheit, wo dert gilt:
Empörig wird am meischte klickt
U jedi schrybt e Kommentar
Und jede git sy Sänf derzue
Di ganzi mysi, fysi Schar
Vo Trolle, di git nie meh Rue
U mängisch dänksch: Oje, i wett
Es hätt’s nie ggä, das Internet!
Natürlech isch nid alles schlächt!
D Vernetzig het vil müglech gmacht
Und gäbig isch das halt ersch rächt
Zum Shoppe, Schaffe, Tag und Nacht
U schliesslech isch das Netz ja vou
Vo Tipps u Wüsse, absolut!
Und näbe däm isch’s lengschtens ou
Ds 1-A-Verkuppligsinschtitut
Jitz gniesst me ds Läbe im Duett
U danket still em Internet
Dys WLAN-Grät hesch geng derby
‘S begleitet di uf Schritt u Tritt
Es isch scho lang dys Vis-à-vis
Du nimmsch’s sogar uf ds Hüsli mit
We’s früecher Bhouptine het ggä
Hesch diskutiert, um jede Prys
Hütt längt’s, dys Handy füreznäh
Und – zack! – da isch er, der Bewys
Statt dass me lenger zäme redt
Wird d Sachlag prüeft im Internet
Und nöi versteisch o jedi Sprach
Ganz ohni vorhär bbüfflet z ha
Du redsch u hesch dys Handy naach
Und scho isch d Übersetzig da!
A Orte, wo d’ no nie bisch gsy
Seit ds GPS, wo d’ düremuesch
Dys Smartphone übernimmt d Regie
U hilft bi allem, wo de tuesch
Bisch wi deheim i frömde Stedt
Dank permanäntem Internet
Und jitz, mit «social distancing»
Wo allne uf e Wecker geit
Wird hüüfig ds Gspräch vo Gring zu Gring
Halt o em Bildschirm übertreit
So hockisch a dym Stubetisch
U luegsch das blöde Vieregg aa;
Dass das e müede Abklatsch isch
Das weisch jitz würklech naadisnaa
Es wird der klar: Mir sy komplett
verlore ohni ds Internet!
Wo füert das hi? Was chunt äch no?
Wi gseht’s i nomal dryssg Jahr uus?
Hei mir denn öppe alli scho
E Schade und sy ganz konfus?
Mir wüsse’s nid u gseh’s vorzue –
Zum Glück hei mir ja geng no d Wahl
O einisch z säge: Gnue isch gnue!
Es bruucht nid alles digital
Wen i’s so gseh, das Internet
De wünscht i mir der Chnopf «Reset»