Ds Paar «A» und «B», di fröie sech uf ihre glücklechscht Tag
Vor allem druuf, uf Wulke Sibe z zwöit i d Chilche z schwäbe
Uf ds Härz, wo chlopfet, we si chunt, di langersehnti Frag
Si wüsse’s scho: Das «Ja» wird ds schönschte «Ja» vo ihrem Läbe
Bi «C» und «D» hingäge isch di Chilche nid so wichtig
Für si isch ds grosse Hochzytsfescht der Houptgrund für sech z troue
Si fröie sech uf ds Ässe, Musig, Party – und zwar richtig!
Für zäme chönne z feschte spile Chöschte o ke Roue
Der «E» u d «F» sy eigentlech ganz wohl gsy ohni Schyn
Doch wo’s de Nachwuchs ggä het, hei si gmerkt: So insgesamt
Wird alls chli kompliziert; drum sy si trotzdäm e Termin
Ga bueche und sy ender luschtlos uf das Standesamt
Für «G» u «H» isch klar gsy: Ihre Feschttag wird speziell!
Am Änd vor Uswahl isch e Zeremoniemeischter bblibe
Mit allne Lüt im Wald, so total unkonventionell
E offizielle Fötzel hei si glych no unterschribe
Bim Päärli «I» und «J» isch’s ganz e and’re Aatrib gsy
Bi ihne gilt, was ihri Gmeind ir Bibel gläse het
Für si isch zäme schlafe vor der Ehe Blasphemie!
Drum bruuche si e Pfarer und ersch denn geit’s ab i ds Bett
Und «K» u «L» sy beidi jitz zum zwöite Mal scho gschide
Mit ihrne Exe hei si gstürmt u gchääret bis uf ds Bluet
Das Single-Läbe macht se aber eifach o nid zfride
Bir dritte Rundi sy si sicher: Dasmal chunt’s scho guet!
Bir «M» hei Chind u Hochzytströim no nie es Füür entfacht
Si dänkt, si heig no Zyt u konzentriert sech uf d Karriere
Wo allerdings bim YB-Mätsch der «N» sy Aatrag macht
Het si sech vor em volle Stadion nümme möge wehre
Ds Paar «O» und «P», di hei sech halt im Usland lehre kenne
Verliebt, verlobt u zersch emal e Fernbeziehig gha
Uf einisch het’s ne glängt, sech immer wider müesse z trenne
Drum sy si uf ds Zivilstandsamt u jitze Frou u Maa
Wo «Q» u «R» no jung sy gsy, het’s strängi Regle ggä
Mit Zwänzgi, wo der Buuch isch gwachse, hei si sech schyniert
Als Erschts het’s mal es Tonnerwätter ggä für das Benäh
Dass druuf o d Hochzyt folgi, het me nid mal diskutiert
Zum Glück isch hütt u hie bi üs ds Hürate nümm es Müesse
Es mache’s eifach die, wo überzügt sy, dass’s ne gfalli
Und all di Lüt, wo finde, dass’s ne ds Läbe wärd versüesse
Di bruuche jitze ds Votum: ‘S het gnue Ehe für üs alli!
O we der Ben Vatter sälber nid ghürate isch, chiem’s ihm nie i Sinn, irgendöpperem, wo das wott mache, ds Rächt derzue z verweigere.